மொத்தமா உருவிய திமுக; கூட்டணி கட்சிகள் தலையில் இறங்கிய இடி!

மொத்தமா உருவிய திமுக; கூட்டணி கட்சிகள் தலையில் இறங்கிய இடி!

நகர்ப்புற உள்ளாட்சி தேர்தலில் கூட்டணி கட்சிகளை ஓரங்கட்டி திமுக வகுத்த வியூகத்தால் பெரும் பரபரப்பு ஏற்பட்டுள்ளது.

காஞ்சிபுரம் மாநகராட்சியில் உள்ள 51 வார்டுகளுக்கும் வரும் 19ஆம் தேதி ஒரேகட்டமாக நகர்ப்புற உள்ளாட்சி தேர்தல் நடைபெறவுள்ளது. இந்த மாவட்டம் திமுகவின் கோட்டையாக திகழ்கிறது. மொத்தமுள்ள 9 சட்டமன்ற தொகுதிகளில் 8ல் திமுக கூட்டணி வெற்றி பெற்றுள்ளது. அதாவது திமுக வசம் 5, விசிக 2, காங்கிரஸ் 1 உள்ளன. ஒரேவொரு தொகுதியில் மட்டும் அதிமுக வெற்றி பெற்றிருக்கிறது. எனவே மிகுந்த உற்சாகத்துடன் உள்ளாட்சி தேர்தலை திமுக களம் காண்கிறது.

இந்நிலையில் காஞ்சிபுரம் மாநகராட்சியில் 1, 12, 35, 49 ஆகிய 4 வார்டுகளும், உத்தரமேரூர் பேரூராட்சியில் ஒரு வார்டும் தங்களுக்கு ஒதுக்குமாறு திமுகவிடம் மார்க்சிஸ்ட் கம்யூனிஸ்ட் கட்சி கோரிக்கை விடுத்தது. ஆனால் மார்க்சிஸ்ட் வழங்கிய பட்டியலில் இல்லாத 23வது வார்டை மட்டும் வழங்க வாய்ப்பிருப்பதாக திமுக தெரிவித்தது. இது கூட்டணி கட்சியான மார்க்சிஸ்டிற்கு பெரும் இடியாய் இறங்கியது.

வெற்றி வாய்ப்புள்ள 4 வார்டுகளை கேட்டால், சம்பந்தமில்லாத ஒரு வார்டை தள்ளப் பார்க்கிறார்கள் என்று அதிருப்தி அடைந்தது. இந்நிலையில் கூட்டணி கட்சிகளுடன் திமுக நடத்திய பேச்சுவார்த்தையில், காங்கிரஸ் 4, விடுதலை சிறுத்தைகள், மதிமுக, தமிழக வாழ்வுரிமை கட்சி ஆகியவற்றுக்கு தலா ஒரு இடம் ஒதுக்க திட்டமிட்டிருப்பதாக தகவல்கள் தெரிவிக்கின்றன. இந்த பட்டியலில் மார்க்சிஸ்ட்டிற்கு ஒரு இடம் கூட இல்லாதது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

குறிப்பாக கம்யூனிஸ்ட் தோழர்கள் மிகுந்த அதிர்ச்சியில் ஆழ்ந்துள்ளனர். காஞ்சிபுரம் மாநகராட்சியை பொறுத்தவரை அரசியல் மற்றும் அமைப்பு ரீதியாக மார்க்சிஸ்ட் கம்யூனிஸ்ட் கட்சி செல்வாக்கு பெற்று விளங்குகிறது. இத்தகைய சூழலில் ஒரு இடம் கூட ஒதுக்காத திமுகவின் செயல் கடும் விமர்சனத்திற்கு ஆளாகியுள்ளது. முதலில் மார்க்சிஸ்ட் கட்சியினருடன் சீட் ஒதுக்கீட்டில் உடன்படும் திமுக,

பின்னர் போட்டி வேட்பாளரை நிறுத்துவது, இல்லையெனில் மார்க்சிஸ்ட் வேட்பாளரை தோற்கடிக்க உள்ளடி வேலைகள் செய்வது என மோசமான அரசியல் தந்திரத்தை முன்னெடுத்து வருவதாக காஞ்சிபுரம் வட்டாரத்தில் அரசல் புரசலாக பேசப்படுகிறது. இதுபற்றி மார்க்சிஸ்ட் கட்சியினர் கூறுகையில், திமுக முரண்பட்டு நிற்பதால் எங்களுக்கு ஒரு நஷ்டமும் இல்லை. ஏனெனில் எங்களுக்கு இருக்கும் செல்வாக்கை பயன்படுத்தி சுயேட்சையாக களம் காண்போம் என்று அதிரடியாக தெரிவித்துள்ளனர்.

இதேபோன்ற நிலை தான் விசிகவிற்கும் ஏற்பட்டுள்ளது. அதாவது, காஞ்சிபுரம் மாநகராட்சிக்கு உட்பட்ட ரிசர்வ் வார்டுகளில் போட்டியிட விசிக விருப்பம் தெரிவித்திருந்தது. ஆனால் அக்கட்சிக்கு பொது வார்டை ஒதுக்கி திமுக சிக்கலில் தள்ளியுள்ளது. இதன் காரணமாக விசிகவை சேர்ந்த சிலர் போராட்டக் களத்தில் குதித்தனர். இவர்களை சமாதானப்படுத்திய கட்சியின் மூத்த நிர்வாகிகள், வேறு வழியின்றி பொது வார்டில் போட்டியிட ஆயத்தப்படுத்தி வருகின்றனர்.

இப்படி வெற்றி வாய்ப்புள்ள இடங்களை தர மறுக்கும் திமுகவின் யுக்தியால் கூட்டணி கட்சிகள் மிகுந்த அதிருப்தியில் இருக்கின்றனர். அதேசமயம் எங்களுடன் உடன்படாவிட்டால் திமுகவிற்கு தான் நஷ்டம் என்று கூட்டணி கட்சி அடித்து சொல்கின்றன. இதனால் காஞ்சிபுரம் மாநகராட்சியில் நடைபெற உள்ள நகர்ப்புற உள்ளாட்சி தேர்தல் திமுகவிற்கு பாதகமாக அமையக்கூடும் என்ற பேச்சு அடிபடுகிறது.