பிளஸ் 2 மாணவர்களுக்கு செய்முறைத் தேர்வு நடைபெறும் தேதி குறித்த முக்கிய அறிவிப்பை அரசு தேர்வுகள் இயக்ககம் அறிவித்துள்ளது.
கொரோனா இரண்டு மற்றும் மூன்றாம் அலை காரணமாக கடந்த கல்வியாண்டை (2020-21) போலவே, நடப்பு கல்வியாண்டிலும் (2021 -22) பள்ளி மாணவர்களுக்கு நேரடி வகுப்புகளை முழுமையாக நடத்த முடியாத நிலை ஏற்பட்டது.
கொரோனா மூன்றாவது அலை ஒரு வழியாக முடிவுக்கு வந்து பிப்ரவரி மாதத்தில் இருந்துதான் மாணவர்களுக்கு பள்ளிகளில் நேரடி வகுப்புகள் நடைபெற்று வருகின்றன.
இதன் விளைவாக 10, 11 மற்றும் 12 ஆம் வகுப்பு மாணவர்களுக்கு ஆண்டு பொதுத் தேர்வுகளும் இந்த முறை ஒத்தி போய் உள்ளன.
பிளஸ் 2 மாணவர்களுக்கு வழக்கமாக பிப்ரவரி மாத இறுதியில் செய்முறை தேர்வுகளும், மார்ச் மாதத்துக்குள் பொதுத் தேர்வுகளும் நடத்தப்படுவது வழக்கம். ஆனால் இந்த முறை பிளஸ் 2 மாணவர்களுக்கு அரசு பொதுத் தேர்வு மே மாதம் 5 ஆம் தேதி முதல் 28 ஆம் தேதி வரை நடைபெற உள்ளது.
இதற்கான கால அட்டவணை ஏற்கெனவே வெளியிட்டுள்ளது. இந்த நிலையில், செய்முறை தேர்வுக்கான தேதிகள் தற்போது அறிவிக்கப்பட்டுள்ளன. பிளஸ் 2 வகுப்பு மாணவர்களுக்கு ஏப்ரல் 25 ஆம் தேதி முதல் மே மாதம் 2 ஆம் தேதி வரை செய்முறை தேர்வுகள் நடத்தப்படும் என்று அரசு தேர்வு துறை இயக்ககம் தெரிவித்துள்ளது.
செய்முறை தேர்வு மதிப்பெண்களை மே 4 ஆம் தேதிக்குள் பள்ளிகளின் நிர்வாகம் மாவட்ட முதன்மை கல்வி அலுவலகத்தில் ஒப்படைக்க வேண்டும் என்றும், முதன்மை கல்வி அலுவலர்கள் மதிப்பெண் பட்டியலை மாவட்ட அரசு தேர்வுகள் உதவி இயக்குநரிடம் மே 14 ஆம் தேதிக்குள் அளிக்க வேண்டும் எனவும் உத்தரவிடப்பட்டுள்ளது.
12 ஆம் வகுப்பு மாணவர்களுக்கு தற்போது இபண்டாம் கட்ட திருப்புதல் தேர்வு நடைபெற்று வரும் நிலையில். அவர்களுக்கான செய்முறை தேர்வு தேதிகள் அறிவிக்கப்பட்டுள்ளது குறிப்பிடத்தக்கது.
No comments:
Post a Comment