ஆம்னி பேருந்துகளில் அதிக கட்டணம்.. அமைச்சர் வார்னிங்!

ஆம்னி பேருந்துகளில் அதிக கட்டணம்.. அமைச்சர் வார்னிங்!

தமிழகத்தில் முழு ஊரடங்கு அமலில் உள்ளது. ஊரடங்கு மே 24ஆம் தேதியுடன் முடிவடைய இருந்த நிலையில் மேலும் ஒரு வாரத்துக்கு நீட்டித்து தமிழக அரசு அறிவித்துள்ளது. பால் விற்பனை உள்ளிட்ட அத்தியாவசிய தேவைகளை தவிர மற்ற தொழில்கள் இயங்க தடை விதிக்கப்பட்டுள்ளது.

முழு ஊரடங்கு அமலுக்கு வரவுள்ள நிலையில் மக்கள் சொந்த ஊர்களுக்கு செல்வதற்கு இன்றும் (மே 22), நாளையும் (மே 23) 4500 பேருந்துகள் இயக்கப்படும் என தமிழக அரசு தெரிவித்துள்ளது. இதுபோக, ஆம்னி பேருந்துகளும் இயங்க அனுமதிக்கப்பட்டுள்ளது.

இந்நிலையில், பேருந்துகள் இயக்கம், பாதுகாப்பு நிலவரம் போன்றவற்றை மதுரை மாட்டுத்தாவணி பேருந்து நிலையத்தில் போக்குவரத்து துறை அமைச்சர் ராஜ கண்ணப்பன் ஆய்வு மேற்கொண்டார்.

அப்போது செய்தியாளர்களிடம் பேசிய அமைச்சர் ராஜ கண்ணப்பன், “பயணிகள் தேவைக்கு ஏற்ப கூடுதல் பேருந்துகள் இயக்கப்படும். ஆம்னி பேருந்துகளில் அதிக கட்டணம் வசூலித்தால் கடும் நடவடிக்கை எடுக்கப்படும்” என்று எச்சரித்துள்ளார்.