ஆட்சியமைக்க நாளை உரிமை கோருகிறார் ஸ்டாலின்: பதவியேற்பு விழாவுக்கு பாஸ்!
தமிழக சட்டமன்றத் தேர்தலில் பதிவான வாக்குகள் நேற்று முன் தினம் எண்ணப்பட்டன. அதில், திமுக கூட்டணி 159 இடங்களில் வெற்றி பெற்றுள்ளது. இந்த வெற்றியின் மூலம் திமுக தலைவர் ஸ்டாலின் தமிழகத்தின் அடுத்த முதல்வராக பதவியேற்கவுள்ளார். பதவியேற்பு விழா எளிமையான முறையில் நடைபெறும் என்று ஸ்டாலின் அறிவித்துள்ளார்.
சட்டமன்ற உறுப்பினர்கள் கூட்டம் கூட்டி, முறையாக தலைவரை தேர்ந்தெடுத்து, அதன் பின் அரசு அதிகாரிகளை கலந்து பேசி பதவிப் பிரமாண நிகழ்வு பற்றி முடிவெடுக்கப்படும் என்றும் ஸ்டாலின் அறிவித்துள்ளார். அதன்படி, தேர்தலில் வெற்றி பெற்ற திமுக எம்.எல்.ஏ.க்களின் கூட்டம் அண்ணா அறிவாலயத்தில் இன்று நடைபெறவுள்ளது. அதில், திமுக சட்டமன்றக் கட்சித் தலைவராக ஸ்டாலின் தேர்ந்தெடுக்கப்படவுள்ளார்.
இந்த நிலையில், தமிழகத்தில் ஆட்சியமைக்க நாளை மாலை 6.30 மணிக்கு ஆளுநர் பன்வாரிலால் புரோஹித்தை சந்தித்து மு.க.ஸ்டாலின் உரிமை கோரவுள்ளதாக தெரிவிக்கப்பட்டுள்ளது. வருகிற 7ஆம் தேதி காலை 10 மணிக்கு தமிழக முதலமைச்சராக மு.க.ஸ்டாலின் பதவியேற்க உள்ளார்.
பதவி ஏற்பு விழாவில் கலந்து கொள்ள ஒவ்வொரு அமைச்சருக்கும் 8 முதல் 10 பாஸ்கள் மட்டுமே வழங்கப்பட்டுள்ளன. மொத்தம் 200 பேருக்கு மட்டுமே அழைப்பு விடுக்கப்பட்டுள்ளது என்பது குறிப்பிடத்தக்கது.
No comments:
Post a Comment