10, 12-ம் வகுப்பு பொதுத்தேர்வு ரத்து - மாநில அரசு அதிரடி

10, 12-ம் வகுப்பு பொதுத்தேர்வு ரத்து - மாநில அரசு அதிரடி

மணிப்பூர் மாநிலத்தில், 10 மற்றும் 12-ம் வகுப்பு பொதுத் தேர்வுகளை ரத்து செய்து, அம்மாநில பள்ளிக்கல்வித் துறை உத்தரவிட்டுள்ளது.

இந்தியாவில், கொரோனா வைரஸ் தொற்றின் இரண்டாவது அலை காரணமாக, கடந்த மார்ச் மாதம் நடைபெற வேண்டிய பள்ளி பொதுத் தேர்வுகள் நாடு முழுவதும் ஒத்தி வைக்கப்பட்டன. இந்நிலையில், மாணவர்களின் நலனில் சமரசம் செய்து கொள்ள முடியாது எனக் கூறி, சி.பி.எஸ்.இ., 12-ம் வகுப்பு பொதுத் தேர்வுகளை, கடந்த சில நாட்களுக்கு முன்பு, மத்திய அரசு ரத்து செய்தது.

மேலும், மதிப்பெண் மதிப்பீட்டு முறையைக் கண்காணிக்கவும் குழு அமைக்கப்பட்டுள்ளது. மத்திய அரசைத் தொடர்ந்து, தமிழகம், ராஜஸ்தான், குஜராத், மத்திய பிரதேசம், மஹாராஷ்டிரா, கர்நாடகா உள்ளிட்ட மாநில அரசுகள், தங்களது மாநிலங்களில், 12-ம் வகுப்பு பொதுத் தேர்வை ரத்து செய்தன.

இந்நிலையில், வடகிழக்கு மாநிலமான மணிப்பூரில், கொரோனா பரவலைக் கருத்தில் கொண்டு, 10 மற்றும் 12-ம் வகுப்பு பொதுத் தேர்வுகளை ரத்து செய்வதாக, அம்மாநில பள்ளிக்கல்வித் துறை அறிவித்துள்ளது. மேலும், மறு உத்தரவு வரும் வரை, மாநிலம் முழுவதும் உள்ள கல்வி நிலையங்கள், பயிற்சி வகுப்புகள், மாணவர்களின் தங்கும் விடுதிகள் அனைத்தையும் மூடுவதற்கு மணிப்பூர் அரசு உத்தரவிட்டுள்ளது.