இந்த மாநிலத்திலும் 10, 12-ம் வகுப்பு தேர்வுகள் ரத்து!

இந்த மாநிலத்திலும் 10, 12-ம் வகுப்பு தேர்வுகள் ரத்து!

அசாம் மாநிலத்தில், கொரோனா தொற்று காரணமாக, 10 மற்றும் 12-ம் வகுப்பு பொதுத் தேர்வுகள் ரத்து செய்யப்படுவதாக, அம்மாநில கல்வித் துறை அமைச்சர் ரனோஜ் பெகு அறிவித்துள்ளார்.

இந்தியாவில், கொரோனா வைரஸ் தொற்றின் இரண்டாவது அலை காரணமாக, கடந்த மார்ச் மாதம் நடைபெற வேண்டிய பள்ளி பொதுத் தேர்வுகள் நாடு முழுவதும் ஒத்தி வைக்கப்பட்டன. இந்நிலையில், மாணவர்களின் நலனில் சமரசம் செய்து கொள்ள முடியாது எனக் கூறி, சி.பி.எஸ்.இ., 12-ம் வகுப்பு பொதுத் தேர்வுகளை, கடந்த சில நாட்களுக்கு முன்பு, மத்திய அரசு ரத்து செய்தது.

மேலும், மதிப்பெண் மதிப்பீட்டு முறையைக் கண்காணிக்கவும் குழு அமைக்கப்பட்டுள்ளது. மத்திய அரசைத் தொடர்ந்து, தமிழகம், ராஜஸ்தான், குஜராத், மத்திய பிரதேசம், மஹாராஷ்டிரா, கர்நாடகா உள்ளிட்ட மாநில அரசுகள், தங்களது மாநிலங்களில், 12-ம் வகுப்பு பொதுத் தேர்வை ரத்து செய்தன. 10 மற்றும் 12-ம் வகுப்பு மாணவர்களுக்கு மதிப்பெண் வழங்குவது குறித்து மாநில அரசுகள் தீவிர ஆலோசனையில் ஈடுபட்டுள்ளன.

இந்நிலையில், வடகிழக்கு மாநிலமான அசாமில், கொரோனா பரவலைக் கருத்தில் கொண்டு, 10 மற்றும் 12-ம் வகுப்பு பொதுத் தேர்வுகள் ரத்து செய்யப்படுவதாக, அம்மாநில கல்வித் துறை அமைச்சர் ரனோஜ் பெகு அறிவித்துள்ளார். 10 மற்றும் 12-ம் வகுப்பு மாணவர்களுக்கு மதிப்பெண்கள் வழங்குவது குறித்து இரண்டு கமிட்டிகள் அமைக்கப்பட்டுள்ளதாகவும், அடுத்த மாதம் 31-ம் தேதி தேர்வு முடிவுகள் வெளியிடப்படும் என்றும் அமைச்சர் ரனோஜ் பெகு தெரிவித்தார்.