ஸ்டாலினை இனிமேல் இப்படி கூப்பிடுங்க: அர்ஜுன் சம்பத்
தமிழ்நாடு முதல்வர் மு.க.ஸ்டாலின் மத்திய அரசு என்பதற்கு பதிலாக ஒன்றிய அரசு என அழைக்கிறார். அதற்கான விளக்கத்தை சட்டமன்றத்திலேயே கொடுத்துள்ளார்.
அவரது பேச்சு பாஜகவை மட்டுமல்லாமல் அவர்களுக்கு அணுக்கமாக இருக்கக்கூடிய பலரையும் திக்குமுக்காடச் செய்துள்ளது. புதிய தமிழகம் கிருஷ்ணசாமி, இந்து மக்கள் கட்சி அர்ஜுன் சம்பத் ஆகியோர் தங்கள் அதிருப்தியை அறிக்கை வாயிலாக பேட்டி மூலமாகவும் வெளிப்படுத்தி வருகின்றனர்.
அர்ஜுன் சம்பத் இது தொடர்பாக வெளியிட்டுள்ள அறிக்கையில், “சமீப காலமாக, மத்தியிலுள்ள பாஜக அரசை, 'மத்திய அரசு' என்று குறிப்பிடுவதை தவிர்த்து, 'ஒன்றிய அரசு' என்று, தமிழக முதல்வர், அமைச்சர்கள், அரசு அதிகாரிகள் குறிப்பிடுகின்றனர். 'டிவி' செய்தி வாசிப்பின்போதும் சில சேனல்கள் தவிர, மற்றவை 'ஒன்றிய அரசு' என்றே குறிப்பிடுகின்றன.
அதே போல், ஸ்டாலினை முதல்வர் என்று தான் அழைக்க வேண்டும் என்பது சட்டம் அல்ல; அவரை ஆலோசனைக் குழு தலைவர் என்றும் அழைக்கலாம். அவர் கவர்னருக்கு ஆலோசனை சொல்லும் குழுவின் தலைவர் தான். இறுதி முடிவு கவர்னரிடம் தான் உள்ளது. இதை நான் சொல்லவில்லை.
இந்திய அரசியலமைப்பு சட்டத்தின் பிரிவு - 163 சொல்கிறது. அதனால், இனிமேல் சட்டப்படி, 'ஆலோசனைக்குழு தலைவர் ஸ்டாலின் அவர்களே' என அழைக்கலாம். 'ஒன்றிய அரசு' சரி என்று ஏற்றுக்கொள்பவர்கள், இதையும் ஏற்க வேண்டும்” என்று குறிப்பிட்டுள்ளார்.
No comments:
Post a Comment