நீங்க இத மட்டும் பண்ணுங்க: மதுரை எய்ம்ஸில் ஜோரா ஆரம்பிச்சுடலாம்!

நீங்க இத மட்டும் பண்ணுங்க: மதுரை எய்ம்ஸில் ஜோரா ஆரம்பிச்சுடலாம்!

மதுரை எய்ம்ஸ் மருத்துவமனைக்கு கடந்த 2019ஆம் ஆண்டு ஜனவரி மாதம் பிரதமர் மோடி அடிக்கல் நாட்டினார். தொடர்ந்து, இதற்கான ஆரம்பகட்ட பணிகள் தொடங்கி நடைபெற்று வருவதாக தெரிவிக்கப்பட்டது. ஆனால், தமிழகத்தோடு சேர்ந்து அறிவிக்கப்பட்ட எய்ம்ஸ் மருத்துவமனைகள் மற்ற மாநிலங்களில் கட்டி முடிக்கப்பட்டு விட்ட நிலையில், மதுரையில் மட்டும் கட்டுமானப் பணிகள் மந்தகதியில் நடைபெற்று வருகிறது.

இதனிடையே, மதுரை எய்ம்ஸ் தொடர்பான வழக்கு ஒன்றின் விசாரணையின் போது, இந்த ஆண்டு எய்ம்ஸில் 50 மாணவர்களுக்கு சேர்க்கையை தொடங்குவது தொடர்பாக மத்திய அரசிடம் பரிந்துரை அளித்துள்ளதாக தமிழக அரசு தெரிவித்தது.

மேலும், எய்ம்ஸ் மருத்துவக் கல்லூரியில் தேர்ந்தெடுக்கப்படும் மாணவர்கள் அருகில் இருக்கும் மருத்துவக் கல்லூரிகளில் தற்காலிகமாக அனுமதிக்கப்படுவர். மதுரை, தேனி, திண்டுக்கல் மருத்துவ கல்லூரிகளில் எய்ம்ஸ் கல்லூரி மாணவர்களுக்கு இடம் தரப்படும். மாணவர்களுக்கு அனைத்து வசதிகளையும் செய்து தர தமிழக அரசு தயாராக உள்ளது. தமிழ்நாடு அரசின் திட்டத்துக்கு

ஒன்றிய அரசு அனுமதி அளித்தால் அது செயல்படுத்தப்படும் என்றும் தமிழக அரசு தெரிவித்தது.

இந்த நிலையில், மதுரை எய்ம்ஸ் மருத்துவமனைக்கான தற்காலிக இடத்தை தேர்வு செய்தால் நடப்பாண்டிலேயே மாணவர் சேர்க்கையை தொடங்கலாம் என்று ஒன்றிய அரசு தெரிவித்துள்ளது.

இதுதொடர்பாக, ஒன்றிய சுகாதாரத்துறை செயலர், தமிழக தலைமைச் செயலருக்கு எழுதியுள்ள கடிதத்தில், “மதுரை எய்ம்ஸ் மருத்துவமனை சார்பாக தற்காலிகமான இடத்தில் நடப்பாண்டில் 50 முதல் 100 மாணவர் சேர்க்கைக்கான வசதிகள், வகுப்பறைகள், அலுவலகத்திற்கு தேவையான இடங்கள் ஆகியவற்றை தமிழ்நாடு அரசு தேர்வு செய்ய வேண்டும். அப்படி தேர்வு செய்து அளிக்கும்பட்சத்தில், அதற்கான செலவுகள், அலுவலர்கள் மற்றும் ஆசிரியர்கள் தேர்வு, உட்கட்டமைப்பு வசதிகள் ஆகிய அனைத்தையும் ஒன்றிய சுகாதாரத்துறை அமைச்சகம் ஏற்றுக் கொள்ளும்” என்று தெரிவிக்கப்பட்டுள்ளது.