டெல்லியில் தனி காரில் பயணம்: மகனுடன் ஓபிஎஸ் பேசிய ரகசியம் என்ன?

டெல்லியில் தனி காரில் பயணம்: மகனுடன் ஓபிஎஸ் பேசிய ரகசியம் என்ன?

அதிமுக ஒருங்கிணைப்பாளர் ஓ.பன்னீர்செல்வம் திடீர் பயணமாக சென்னையில் இருந்து விமானம் மூலம் டெல்லி புறப்பட்டு சென்றுள்ளார். நாளை காலை 11 மணிக்கு பிரதமர் மோடியை அவர் சந்திக்கவுள்ளார்.

எம்.பி.யாக இருக்கும் தனது மகன் ஓ.பி.ரவீந்திரநாத்துக்கு மத்திய அமைச்சர் பதவியை எதிர்பார்த்து ஓபிஎஸ் காத்திருந்தார். ஆனால், அண்மையில் மாற்றியமைக்கப்பட்ட அமைச்சரவையில் அதிமுகவுக்கு இடமளிக்கப்படவில்லை. அத்துடன், அதிமுகவில் உட்கட்சி பிரச்ச்சினை நிலவி வருவதுடன், பாஜகவுடன் கூட்டணி அமைத்ததால்தான் தேர்தலில் தோல்வியடைந்தோம் என்றும் பேசப்பட்டு வருகிறது.

இந்த நிலையில், டெல்லி சென்றுள்ள ஓபிஎஸ், பாஜக மூத்த தலைவர்களை சந்தித்து நாளை பேசவுள்ளார். இதற்கான டெல்லி சென்றுள்ள ஓ.பன்னீர்செல்வத்தை அழைத்து வர தமிழ்நாடு அரசு இல்லத்தில் இருந்து அரசு வாகனம் அனுப்பி வைக்கப்பட்டது. அதே வேளையில் மழைக்கால கூட்டத்தொடரில் பங்கேற்க டெல்லியில் முகாமிட்டு இருக்கும் அவரது மகன் ரவீந்திரநாத் விமான நிலையம் சென்று தந்தையை வரவேற்றார்.

தொடர்ந்து, ஓபிஎஸ்-யை அழைத்து வர தமிழ்நாடு அரசு இல்ல வாகனம் சென்றிருந்த போதும், அதில் ஏறாமல், வேறொரு தனி காரில் விமான நிலையத்தில் இருந்து தமிழ்நாடு இல்லம் வரை தனது மகனுடன் ஓபிஎஸ் வந்தார். இருவரும் பல்வேறு விஷயங்கள் குறித்து தனியாக பேச விரும்பியதால் தனியார் வாகனத்தை பயன்படுத்தியதாக கூறப்படுகிறது. அந்த பயணத்தின்போது, பாஜக தலைவர்களிடம் நாளை பேசவுள்ள விஷயங்கள், மகனுக்கு அமைச்சர் பதவி அதிமுகவில் நடக்கும் களேபரங்கள், சசிகலா விவகாரம் உள்ளிட்டவைகள் குறித்து இருவரும் பேசியதாக தெரிகிறது.

டெல்லியில் உள்ள தமிழ்நாடு இல்லத்திற்கு வந்த அதிமுக ஒருங்கிணைப்பாளர் ஓ.பண்ணீர்செல்வத்திடன், அவரது டெல்லி பயணம் குறித்து செய்தியாளர்கள் கேள்வி எழுப்பினார்கள். அப்போது செய்தியாளர்களுக்கு பேட்டி அளிப்பதை தவிர்க்கும் வகையில், தனது தந்தையை லாவகமாக அழைத்து சென்று விட்டார் அவரது மகன் ஓபிஆர் என்பது கவனிக்கத்தக்கது. தமிழக சட்டமன்ற தேர்தல் தோல்விக்கு பிறகு அதிமுகவின் ஒருங்கிணைப்பாளர் ஓபிஎஸ்-இன் டெல்லி பயணம் அரசியல் அரங்கில் பரபரப்பாக பேசப்பட்டு வருகிறது.