பள்ளி மாணவர்களுக்கு சிறப்பான வாய்ப்பு; தமிழக அரசு முக்கிய அறிவிப்பு!

பள்ளி மாணவர்களுக்கு சிறப்பான வாய்ப்பு; தமிழக அரசு முக்கிய அறிவிப்பு!

தமிழகத்தில் கொரோனா பரவலின் இரண்டாவது அலை பெரிதும் தணிந்திருக்கும் சூழலில் வரும் செப்டம்பர் ஒன்றாம் தேதி முதல் 9 முதல் 12ஆம் வகுப்பு வரையிலான மாணவர்களுக்கு பள்ளிகளை திறக்க மு.க.ஸ்டாலின் தலைமையிலான திமுக அரசு முடிவு செய்துள்ளது. இதற்கான ஏற்பாடுகள் அனைத்தும் தயார் நிலையில் இருப்பதாக பள்ளிக் கல்வித்துறை அமைச்சர் அன்பில் மகேஷ் பொய்யாமொழி தெரிவித்துள்ளார். இந்நிலையில் அனைத்து மாவட்ட முதன்மை கல்வி அலுவலர்களுக்கு பள்ளிக் கல்வி இணை இயக்குநர் நரேஷ் சுற்றறிக்கை ஒன்றை அனுப்பியுள்ளார்.

இலவச கல்வி உபகரணங்கள்

அதில், தமிழக அரசுப் பள்ளிகளில் மாணவர்களுக்கு வழங்கப்பட்டு வரும் இலவச கல்வி உபகரணப் பொருட்களின் தரம், அளவு, வண்ணம் மற்றும் மாணவர்கள் பயன்படுத்த ஏற்ற வகையில் இருக்கிறதா என்று மாணவர்களின் கருத்துகளை பெற்று அனுப்ப வேண்டும் என்று கடந்த மாதம் 20ஆம் தேதி பள்ளிக் கல்வித்துறை சார்பில் நடைபெற்ற கூட்டத்தில் அறிவுறுத்தப்பட்டது.

கல்வி மாவட்ட வாரியாக அறிக்கை

ஒவ்வொரு கல்வியாண்டும் விலையில்லா கல்வி உபகரணப் பொருட்கள் மாணவர்களுக்கு வழங்கப்பட்ட உடன் நான்கு அல்லது ஐந்து நாட்களுக்குள் மாணவர்களிடம் விலையில்லா கல்வி உபகரணப் பொருட்களின் பயன்பாடு குறித்த கருத்துகள் பெறப்படுவது வழக்கம். ஒவ்வொரு கல்வி மாவட்டத்திற்கும் தனித்தனியாக அறிக்கை பெறப்பட வேண்டும்.

இரண்டு நகல்கள் அனுப்ப உத்தரவு

விலையில்லா கல்வி உபகரணப் பொருட்கள் தேவை பட்டியலின் அடிப்படையில் தான் பெறப்பட்டுள்ளதா என்றும், அவற்றின் தரம் சரியான முறையில் உள்ளனவா என்றும் அலுவலர்கள் மூலம் சரிபார்க்க வேண்டும். அதன் விவரத்தை உடனடியாக அனுப்ப வேண்டும். இதையொட்டி மாவட்டத்தில் உள்ள மாவட்டக் கல்வி அலுவலர், தலைமையாசிரியர்கள் வாயிலாக கருத்துகள் கோரப்பட்டுள்ளன.

அதற்காக கொடுக்கப்பட்டுள்ள படிவத்தில் பூர்த்தி செய்து கல்வி மாவட்டம் வாரியான தொகுப்பறிக்கையை சென்னை தமிழ்நாடு பாடநூல் மற்றும் கல்வியியல் பணிகள் கழகத்திற்கு அனுப்பி வைக்க வேண்டும். இரண்டு நகல்கள் விரைவு அஞ்சலில் அனுப்ப வேண்டும் என்று வலியுறுத்தப்பட்டுள்ளது.