‘சூ… மந்திரகாளி!’... முதல்வர் ஸ்டாலின் பேச்சு!
ஆதி திராவிடர் மற்றும் பழங்குடியினர் நலத் துறையால் மாநில அளவிலான உயர்நிலை விழிப்புணர்வு மற்றும் கண்காணிப்புக் குழுக் கூட்டத்தில் முதல்வர் ஸ்டாலின் கலந்து கொண்டார். அதில் பேசிய அவர், “திமுக எப்போதெல்லாம் ஆட்சி அமைக்கிறதோ, அப்போதெல்லாம், ஆதிதிராவிடர் மற்றும் பழங்குடியினர் மேன்மைக்கான நல்ல பல திட்டங்களைச் செயல்படுத்துவதை
வழக்கமாகக் கொண்டிருக்கிறது. அந்த வகையில் ஆறாவது முறையாக ஆட்சி அமைத்துள்ள கழக அரசு, ஆதிதிராவிடர், பட்டியலினத்தவர், பழங்குடியினர் நலனுக்காகப் பல்வேறு திட்டங்களைச் செயல்படுத்தி இருக்கிறது” என்றார்.
மேலும் அவர் பேசுகையில், “கல்வி, வேலைவாய்ப்பில் அம்மக்கள் உரிய இடங்களைப் பெற வேண்டும். சமூக அமைப்பில் அவர்கள் எந்தச் சூழலிலும் புறக்கணிக்கப்படக் கூடாது. சாதியைக் காரணம் காட்டி அவர்களது வளர்ச்சி தடுக்கப்படக் கூடாது.
அரசியல், பொருளாதாரம், கல்வி ஆகிய அனைத்து மட்டங்களிலும் அவர்கள் வளர்த்தெடுக்கப்பட வேண்டும். அனைவருக்கும் அனைத்தும் கிடைக்க வேண்டும்.
இத்தகைய சிந்தனை கொண்ட அரசுதான் திமுக அரசு. அப்படித்தான் செயல்பட்டுக் கொண்டிருக்கிருக்கிறது. ‘சூ… மந்திரகாளி!’ என்பதைப் போல நாளையே இவை எல்லாம் நடந்துவிடும் என்று நானும் நினைக்கவில்லை; நீங்களும் நினைக்கமாட்டீர்கள். ஆனால் ஒவ்வொரு நாளும் இந்த இலக்கை அடைவதற்கான நமது தூரம் குறைக்கப்பட வேண்டும்” என்றார்.
கல்வி, பொருளாதாரம், நாகரிகம் வளர்ந்தாலும் சாதி, தீண்டாமை, ஏற்றத்தாழ்வு என்பது அப்படியேதான் இருக்கின்றன. அதில் மாற்றம் செய்ய இன்னும் பல ஆண்டுகாலம் கடக்க வேண்டும் என்றே தெரிகிறது. இதனைச் சட்டத்தின் மூலமாக ஓரளவு சரிசெய்ய முடியும். அத்தகைய சட்டங்கள் முறையாகப் பயன்படுத்தப்பட வேண்டும்
என்றும் ஸ்டாலின் அப்போது வலியுறுத்தினார். தீண்டாமை குற்றம் இழைத்தவர் தப்பிவிடக் கூடாது. அதே நேரத்தில், அந்தச் சட்டத்தை யாரும் தவறாகப் பயன்படுத்திவிடவும் கூடாது என்றும் ஸ்டாலின் சுட்டிக்காட்டினார்.
ஆதிதிராவிட மற்றும் பழங்குடியின மக்களின் வாழ்வியல் பொருளாதார முன்னேற்றத்திற்கு இந்த அரசு எப்போதும் துணையாக இருக்கும் என்றும் ஸ்டாலின் அப்போது உறுதிபட தெரிவித்தார்.
No comments:
Post a Comment