ரூ.50 கோடி செலவு பண்ணாலும் ஜெயிக்க முடியாது- அதிமுகவை எதிர்க்கும் சி.வி.சண்முகம்!
அதிமுகவின் உட்கட்டமைப்பினை உறுதிபடுத்தவில்லை என்றால் 50 கோடி ரூபாய் செலவு செய்தாலும் வெற்றி பெற முடியாது என முன்னாள் அமைச்சர் சி.வி.சண்முகம் தெரிவித்துள்ளார்.
அதிமுக உட்கட்சித் தேர்தலில் ஒருங்கிணைப்பாளராக ஓ.பன்னீர்செல்வமும், இணை ஒருங்கிணைப்பாளராக எடப்பாடி பழனிசாமியும் போட்டியின்றி தேர்வாகினர். அதனைத் தொடர்ந்து மாவட்டவாரியாக உட்கட்சி தேர்தல் நடத்தப்பட்டு வருகிறது. அதன்படி கிழக்கு, மேற்கு, வடக்கு, தெற்கு என நான்காகப் பிரிக்கப்பட்டிருக்கும் கடலூர் மாவட்டத்தில் டிசம்பர் 22, 23-ம் தேதிகளில் தேர்தல் நடக்கும் என்று தகவல் வெளியானது.
கடலூர், பண்ருட்டி என இரண்டு தொகுதிகளைக்கொண்ட வடக்கு மாவட்ட அதிமுக-வில் கடலூர் நகரச் செயலாளர், ஒன்றியச் செயலாளர் ஏற்கெனவே நீக்கப்பட்ட நிலையில் புதிய பொறுப்பாளர்ள் இன்னும் நியமிக்கப்படவில்லை. விழுப்புரத்தில் அதிமுக உட்கட்சி அமைப்புத் தேர்தல் நாளை மற்றும் நாளை மறுதினம் நடைபெறுகிறது.
இந்நிலையில், உட்கட்சி தேர்தல் தொடர்பான ஆலோசனை கூட்டம் விழுப்புரத்திலுள்ள தனியார் திருமண மண்டபத்தில் நடைபெற்றது. முன்னாள் அமைச்சர்கள் ஓ.எஸ்.மணியன், சிவி சண்முகம் தலைமையில் இந்த கூட்டம் நடைபெற்றது.
கூட்டத்தில் முன்னாள் அமைச்சர் சி.வி.சண்முகம் பேசியதாவது:-
"உள்ளாட்சி தேர்தலில் பெற்ற தோல்வியை நினைத்து வேதனைபடாமல், கழக நிர்வாகிகள் வரக்கூடிய நாடாளுமன்ற தேர்தல், சட்டமன்ற தேர்தலில் அதிமுக வெற்றி பெற வேண்டும் என்று செயல்பட்ட வேண்டும். அதிமுக நாடாளுமன்ற தேர்தல் மற்றும் சட்டமன்ற தேர்தலில் வெற்றி பெற வேண்டும் என்றால் கட்சியின் உட்கட்டமைப்பினை உறுதி படுத்த வேண்டும். இல்லையென்றால் 50 கோடி செலவு செய்தாலும் தேர்தலில் வெற்றி பெற முடியாது" எனக் கூறினார்.
ஏற்கனவே அதிமுகவில் உட்கட்சிபூசல் நிலவி வருவதாக எதிர்கட்சிகள் குற்றம்சாட்டி வரும் நிலையில் முன்னாள் அமைச்சர் சண்முகத்தின் இந்த பேச்சு அதனை உறுதிப்படுத்தும் விதமாக உள்ளதாக அரசியல் விமர்சகர்கள் கருத்து தெரிவிக்கின்றனர்.
No comments:
Post a Comment