இந்திய இல்லத்தரசிகளின் அதிகரித்துவரும் தற்கொலைகள்!

இந்திய இல்லத்தரசிகளின் அதிகரித்துவரும் தற்கொலைகள்!

இந்திய அரசாங்கத்தின் தேசியக் குற்றப் பதிவு ஆவணக் காப்பகத்தின் (NCRB) தரவுகளின்படி 2020ஆம் ஆண்டில் 22,372 இல்லத்தரசிகள் தற்கொலை செய்துகொண்டிருக்கின்றனர்

தகவல்களும் புள்ளிவிவரங்களும் இறைந்து கிடக்கின்றன. ஆனால் அதில் இருப்பது வெறுமனே எண்களோ, கருத்துக்களோ இல்லை. விலை மதிக்க முடியாத வாழ்க்கை. வலி நிறைந்த வாழ்க்கையிலிருந்து தப்பிப்பதற்கு இந்தியப் பெண்களுக்கு உள்ள வழி தற்கொலை. திருமண வாழ்க்கையின் பொருட்டு ஒரு நாட்டின் பெண்கள் தற்கொலை செய்கிறார்கள் என்றால் அந்த நாடு எவ்வளவு நோய்வாய்ப்பாட்டு இருக்க வேண்டும்? கீழ்க்கண்ட புள்ளி விவரங்களை உற்று நோக்குங்கள். நமது வீட்டின் பெண்கள் எந்த மனநிலையில் இருக்கிறார்கள் என்பதை அந்த எண்கள் ஒளித்து வைத்துள்ளன.

நாளொன்றுக்கு 61 தற்கொலைகள்

இந்திய அரசாங்கத்தின் தேசியக் குற்றப் பதிவு ஆவணக் காப்பகத்தின் (NCRB) தரவுகளின்படி 2020ஆம் ஆண்டில் 22,372 இல்லத்தரசிகள் தற்கொலை செய்துகொண்டிருக்கின்றனர். சராசரியாக நாளொன்றுக்கு 61 தற்கொலைகள். ஒவ்வொரு 25 நிமிடங்களுக்கும் ஒரு தற்கொலை. ஆம். அரை மணிநேரத்திற்கு ஒரு முறை நமது மனைவி, தாய், சகோதரி, மகள் என்று யாரோ ஒரு பெண்மணியை நாம் தற்கொலையின் பொருட்டு இழக்கிறோம். ஒரு இலட்சம் பேரில் கிட்டத்தட்ட இருவரைப் பறிகொடுக்கிறோம்.

2020ஆம் ஆண்டில் தற்கொலை செய்துகொண்ட மொத்தப் பெண்களின் எண்ணிக்கையில் 50%-த்திற்கும் அதிகமானோர் இல்லத்தரசிகள். அதே ஆண்டில் இந்தியாவில் நடந்த ஒட்டுமொத்தத் தற்கொலைகளின் எண்ணிக்கை 1,53,052. இதில் சுமாராக 15% தற்கொலைகள் இல்லத்தரசிகள். ஏறக்குறைய தற்கொலை செய்துகொண்டு மரித்துப்போகும் 6 இந்தியர்களின் ஒருவர் இல்லத்தரசி.

இந்தத் தற்கொலை தீடீரென்று அதிகரித்த ஒன்றல்ல. 1997ஆம் ஆண்டு தேசியக் குற்ற ஆவணக் காப்பகம் தற்கொலை தரவுகளைத் துவங்கியதிலிருந்து ஒவ்வொரு ஆண்டும் 20,000-த்திற்கும் மேற்பட்ட இல்லத்தரசிகள் தற்கொலை செய்துகொள்கின்றனர். 2009ஆம் ஆண்டில் இந்த எண்ணிக்கை 25,092 ஆக உயர்ந்தது.

என்சிஆர்பி தரவுகளின்படி இந்தியாவில் அதிகம் தற்கொலை செய்துகொள்ளும் பிரிவுகளில் இல்லத்தரசிகள் முதன்மையானவர்கள். 2018ஆம் ஆண்டில் நாளொன்றுக்கு 63 பேர் தற்கொலை செய்துகொண்டிருக்கின்றனர். இது தற்கொலை செய்து இறந்து போனவர்களின் கணக்கு. தற்கொலைக்கு முயன்றவர்களின் கணக்கு என்ன?

சிறைச்சாலையாக மாறும் மண வாழ்வு

ஹரியானாவின் ரோதக் பகுதியைச் சேர்ந்த 36 வயதான ஷிவானிக்கு (பெயர் மாற்றப்பட்டுள்ளது) திருமணம் நடந்து 16 ஆண்டுகள் ஆகிவிட்டன. திருமணமான ஆரம்ப ஆண்டுகளிலிருந்தே அவர் கடும் மன அழுத்தத்திற்கு ஆளாகிவிட்டார். அவரது கணவரும் குடும்பத்தினரும் அவரை ஒரு வேலையாள் போல நடத்தினர். அவர் சற்று குண்டாக இருப்பதையும் நோய்வாய்ப்படுவதையும் கணவர் அடிக்கடி இழிவுபடுத்துவார். 2017ஆம் ஆண்டில் அவர் அதிக தூக்க மாத்திரைகளை உட்கொண்டு தற்கொலைக்கு முயன்றார்.

ஷிவானி மயக்கமடைந்ததைக் கண்ட அவரது மாமியார், மருமகளது சகோதரனை அழைத்தார். பிறந்த வீட்டினர் அவரை அருகிலுள்ள மருத்துவமனையின் தீவிர சிகிச்சைப் பிரிவுக்கு அழைத்துச் சென்றனர். அங்கு மருத்துவர் அவரை சுயநினைவுக்குக் கொண்டுவந்து வாந்தி எடுக்கவைத்துக் காப்பாற்றினார். ஷிவானி பிழைத்துக்கொண்டார்.

அந்த ஆண்டில் தேசியக் குற்ற ஆவணக் காப்பகத் தரவுகளின்படி தற்கொலை செய்துகொள்ள முயன்ற 2,075 இந்தியர்களின் ஷிவானியும் ஒருவர். மருத்துவமனை காவல் துறையை அழைத்தது. ஆனால் ஷிவானியும் அவரது குடும்பத்தினரும் ஒரு கடிதத்தில் இந்தத் தற்கொலை முயசிக்குக் காரணம் ஷிவானியின் கணவர் அல்ல என்று எழுதிக் கையெழுத்திட்டனர். வழக்கு எதுவும் பதிவு செய்யப்படவில்லை. பெரும்பாலான தற்கொலை முயற்சிகளில், காவல் துறை வழக்குகள் அரிதாகவே பதிவு செய்யப்படுகின்றன.

"பெண்கள் திருமணத்தைப் பற்றி மிகவும் உற்சாகமாக இருக்கிறார்கள். ஆனால் திருமணத்தின் உண்மையான முகம் வெளிப்படும்போது அது சிறைச்சாலையாக மாறிவிடுகிறது" என்று சமூகவியல் அறிவியலாளர் தீபா நாராயண் கூறுகிறார். இவர் Chup: Breaking the Silence About India’s Women எனும் நூலின் ஆசிரியர். மேலும் இது போன்று பல இளம் பெண்கள் மன அழுத்தத்திற்கு ஆளானாலும் உதவியை நாடுவதில்லை. அப்படி உதவி நாடினாலும அவர்களை கவனிப்பார் யாருமில்லை என்கிறார்.

"இல்லத்தரசிகள் தவறாக நடத்தப்பட்டாலும், பொதுவாக அவர்களது குடும்பத்தினர் 'அட்ஜஸ்ட்' செய்யதுகொண்டுபோகச் சொல்வார்கள். இதனால் அவர்கள் மேலும் விரக்திக்கும் தனிமைப்படுத்தலுக்கும் ஆளாகிறார்கள் என்கிறார் தீபா நாராயண். இது இல்லத்தரசிகள் தற்கொலைக்கு முதன்மையான காரணங்களில் ஒன்று என்றும் கூறுகிறார்.

ஷிவானியின் திருமணம் குடும்பத்தினரால் ஏற்பாடு செய்யப்பட்டது. திருமணமான முதல் ஆண்டிலிருந்தே அவர் விவாகரத்து செய்ய விரும்புவதாகத் தனது குடும்பத்தினரிடம் கூறிவந்தார். ஆனால் விவாகரத்துக்கு எதிராக குடும்பத்தினர் அவருக்கு ஆலோசனை வழங்கினர்.

2012இல் ஷிவானியின் அண்ணி தற்கொலை செய்துகொண்டார். அடிக்கடி ஏற்படும் ஒற்றைத் தலைவலியால் தற்கொலை செய்துகொண்டதாக அவரது கணவரின் குடும்பத்தினர் கூறுகின்றனர், ஆனால் ஷிவானி தனது அண்ணி ஒற்றைத் தலைவலி குறித்து ஒருபோதும் சொன்னதில்லை என்று கூறினார். போலீஸ் வழக்கு எதுவும் பதிவு செய்யவில்லை.

தற்கொலையா, கொலையா?

இதுபோன்ற வழக்குகளில் காவல் துறையில் புகாரளிக்கக் குடும்பங்கள் தயங்குவதால் NCRB தரவுகளின் எண்ணிக்கை குறைவாகக் காட்டப்பட வாய்ப்பிருக்கிறது. சில சமயங்களில் வரதட்சணை மரணங்கள்கூடத் தற்கொலைகளாகப் பதிவாகலாம். உண்மையில் இது கொலை வழக்கு இல்லையா?

"பெண்களின் தற்கொலைகளில் குறைந்தது 50% வரதட்சணை தொடர்பானதாக இருக்கலாம். ஆனால் பெண்ணின் பெற்றோர் வரதட்சணை கொடுப்பதால் வழக்குகள் குறைவாகவே பதிவு செய்யப்படுகின்றன, மேலும் வரதட்சணை கொடுப்பதும் குற்றம் என்பதாலும் யாரும் இது குறித்துப் பேச மாட்டார்கள்" என்கிறார் விமோச்சனா என்ற பெண்ணுரிமைக்கான தன்னார்வத் தொண்டு நிறுவனத்தைச் சேர்ந்த டோனா பெர்னாண்டஸ்.

வரதட்சணைக் கொடுமையால் ஏற்படும் மரணங்கள், தீக்காயம், அடுப்பு வெடித்தல், குளியலறையில் விழுதல் போன்றவை தற்கொலைகளுக்குப் பதில் விபத்து மரணங்களாகப் பதிவாகியுள்ளன. இவற்றையெல்லாம் கணக்கில் கொண்டால் இல்லத்தரசிகளின் தற்கொலைகள் கணக்கு அதிகம் வரும்.

2016ஆம் ஆண்டு ஆய்வின்படி கணவர்கள், மாமியார் அல்லது இதர பெண்களால் ஏற்படும் பல தீக்காயங்களும் இறப்புகளும் விபத்துகளாக வகைப்படுத்தப்படுகின்றன.

இந்த ஆய்வு பெண்களிடையே 22 தீக்காயங்களை ஆய்வு செய்தது. அதில் 15 விபத்துக்கள் எனப் பதிவாகியுள்ளன. விசாரணையில் மூன்று மட்டுமே விபத்துகள் என்றும், மற்றவை சுயமாக ஏற்படுத்திக்கொண்டவை அல்லது பிறரால் ஏற்பட்டவை என்றும் தெரியவந்தது. அந்த நேரத்தில் 22 பெண்களில் 19 பேர் குடும்ப வன்முறையை அனுபவித்துவந்தனர் என்றும் ஆய்வில் தெரியவந்துள்ளது.

புகார்களோ, அறிக்கைகளோ, வழக்குகளோ அறிக்கைகள் எப்போதும் இத்தகைய தற்கொலைகளை "குடும்பப் பிரச்சினைகள்" அல்லது "திருமணம் தொடர்பான பிரச்சினைகள்" என்று குற்றம் சாட்டுகின்றன. ஆனால் உண்மையில் ஆயிரக்கணக்கான பெண்களை உயிரை மாய்த்துக்கொள்ளத் தூண்டுவது எது?

குடும்ப வன்முறையே காரணம்

மனநல வல்லுநர்களின் கூற்றுப்படி குடும்ப வன்முறையே பெண்களின் துயரத்திற்கு முக்கியக் காரணம். அரசு சர்வே ஒன்றின்படி 30% பெண்கள் அவர்களது கணவர்களின் மூலம் வன்முறையை எதிர்கொண்டதாகக் கூறியிருக்கிறர்கள். மூச்சுத் திணற வைக்கும் தினசரி வன்முறை திருமணங்களைக் கடுமையாகத் தாக்குகிறது.

"பெண்கள் உண்மையில் உறுதியானவர்கள். ஆனால் சகிப்புத்தன்மைக்கும் ஒரு எல்லை உண்டு" என்று வாரணாசியில் உள்ள மருத்துவ உளவியலாளர் டாக்டர் உஷா வர்மா ஸ்ரீவாஸ்தவா கூறுகிறார்.

மேலும், “பெரும்பாலான பெண்களுக்கு 18 வயதை எட்டியவுடன் திருமணம் செய்துவைக்கப்படுகிறது. அவள் மனைவியாகவும் மருமகளாகவும் மாறி மாறி ஒரு நாள் முழுவதும் வீட்டில் உள்ள சமையல், சுத்தம், துவைத்தல் முதலான அனைத்து வீட்டு வேலைகளைச் செய்கிறாள். எல்லா விதமான கட்டுப்பாடுகளும் அவள் மீது வைக்கப்படுகின்றன. அவளுக்கு தனிப்பட்ட சுதந்திரம் குறைவாக உள்ளது மற்றும் அவளது சொந்த பணத்தை அரிதாகவே அணுக முடியும்” என்கிறார்.

"அவளுடைய கல்வியும் கனவுகளும் இனி ஒரு பொருட்டல்ல, அவளுடைய லட்சியம் மெதுவாக அணையத் தொடங்குகிறது, மேலும் விரக்தியும் ஏமாற்றமும் உருவாகிறது. வெறும் இருப்பு சித்திரவதையாகிறது" என்று சொல்லும் மருத்துவர் ஸ்ரீவாஸ்தவா, வயதான பெண்கள் தற்கொலை செய்துகொள்வதற்கான காரணம் வேறு என்கிறார்.

“குழந்தைகள் வளர்ந்து ஆளாகி வீட்டை விட்டுச் சென்ற பிறகு பலரும் தனிமையில் இருப்பார்கள். தனிமையில் விரக்தியும் மன அழுத்தமும் அவர்களைத் தற்கொலைக்கு இட்டுச் செல்கின்றன” என்கிறார்.

உலக அளவில் அதிக எண்ணிக்கையிலான தற்கொலைகள் இந்தியாவில்தான் நடக்கின்றன. உலகளாவிய தற்கொலைகளில் இந்திய ஆண்கள் நான்கில் ஒரு பங்கைக் கொண்டுள்ளனர். 15 முதல் 39 வயதுக்குட்பட்ட உலகளாவிய தற்கொலைகளில் இந்தியப் பெண்கள் எண்ணிக்கை 36%. இதன்படி இந்தியாவின் இளையோரில் தற்கொலை செய்துகொள்வோரில் அதிகம் பெண்கள் என்றால் அதில் இல்லத்தரசிகள் பெரும்பான்மையினர்.

1998 -2014ஆம் ஆண்டுகளில் லான்செட் பத்திரிகை செய்த ஆய்வின்படி இந்தியாவில் பதிவு செய்யப்படாத தற்கொலைகளின் விகிதம் 30முதல் 100 விழுக்காட்டிற்குள் இருக்கலாம்.

தேசிய மனநலம் மற்றும் நரம்பியல் அறிவியல் கழகத்தின் 2020 ஜனவரி மாத ஆய்வின்படி தற்கொலை செய்துகொள்வோர், அதற்கு முயற்சி செய்வோரில் ஆண்களை (4.1%) விட அதிகமாக பெண்கள் (6%) இருப்பது தெரியவந்த்து. இக்கழகம் தேசிய மனநல சர்வே 2015-16இன் அறிக்கையை வைத்து இந்த உண்மையை முன்வைக்கிறது.

2018 தேசியக் குற்ற ஆவணக் காப்பகத் தரவுகளின்படி, இந்தியாவில் ஒவ்வொரு நாளும் சராசரியாக 20 வரதட்சணை மரணங்கள், 35 வரதட்சணை வழக்குகள், 283 வழக்குகள் கணவன் அல்லது அவனது உறவினர்களால் மனைவிக்கு எதிராகப் பதிவு செய்யப்படுகின்றன.

2018 ஆக்ஸ்பாம் இந்தியா கணக்கெடுப்பில் உத்தரப் பிரதேசம், பிகார், ஜார்க்கண்ட், சத்தீஸ்கர் ஆகிய மாநிலங்களிலிருந்து பதிலளித்த 1,000 பேரில் பாதிக்கும் மேற்பட்டவர்கள் (53%) குழந்தைகளை நன்றாகப் பராமரிக்கத் தவறினால் ஒரு பெண்ணைக் கடுமையாக விமர்சிப்பது ஏற்றுக்கொள்ளத்தக்கது என்று கூறியிருக்கிறார்கள். அதே காரணத்திற்காக ஒரு பெண்ணை அடிப்பது ஏற்றுக்கொள்ளத்தக்கது என்றும் 33% பேர் கூறியிருக்கின்றனர்.

இப்படி வெளிப்படையாகப் பெண்களை அடிக்கலாம் என்று கூறும் நாட்டில் நாம் ஏன் அவர்களை இல்லத்தரசிகள் என்று அழைக்க வேண்டும்? இல்லத்தடிமைகள் என்று வைத்துக்கொள்ளலாமே?

*

தகவல் உதவி: இன்டியா ஸ்பென்ட், தேசியக் குற்ற ஆவணக் காப்பகம்

தற்கொலை குறித்த எண்ணம் இருப்போர் AASRA website –ல் தொடர்புகொள்ளலாம். தமிழகம், சென்னையில் தற்கொலை தொடர்பான ஆலோசனைகள் பெறவும் தொடர்புகொள்ளவும்:

https://snehaindia.org/new/

+91 44 2464 0050 , +91 44 2464 0060

#11, Park View Road,

R.A. Puram, Chennai-600028.

Mail: help@snehaindia.org