சென்னையைப் புரட்டிப் போட்ட மழை.. இது "காலநிலை பேரழிவு".. உஷாராக வேண்டிய தருணம்!

சென்னையைப் புரட்டிப் போட்ட மழை.. இது "காலநிலை பேரழிவு".. உஷாராக வேண்டிய தருணம்!

666666666666666666666666666666666666666666666666666666

காலநிலை பேரழிவு கட்டத்தை நாம் எட்டி விட்டோம் என்பதற்கான அறிகுறியே சென்னை பெருமழை என்று நிபுணர்கள் எச்சரிக்கின்றனர்.

காலநிலை மாற்றம் குறித்து விஞ்ஞானிகளும், நிபுணர்களும் காட்டுக் கத்து கத்தினாலும் அதை யாரும் கண்டு கொள்வதாக இல்லை. அதன் தீவிரம் யாருக்கும் இன்னும் புரியவில்லை. சென்னையை நேற்று புரட்டிப் போட்ட பெரு மழைக்குப் பிறகாவது அதுகுறித்த விழிப்புணர்வு கொஞ்சமாவது மக்களுக்கு வந்திருக்கும் என்று நம்புவோம்.

நேற்று சென்னையை உலுக்கி எடுத்து வாழ்க்கையை ஸ்தம்பிக்க வைத்த கன மழையை எந்த வானியல் அமைப்பாலும் துல்லியமாக கணித்துக் கூற முடியவில்லை. சென்னை வெதர்மேன் பிரதீப் ஜானும் கூட இதை நாங்கள் எதிர்பார்க்கவில்லை. எந்த மாடலும் இந்த சூழலை சுட்டிக் காட்டவில்லை என்று தெரிவித்துள்ளார். உண்மையில் யாராலும் இதை முன்கூட்டியே சொல்ல முடியவில்லை. ஆனால் திடீரென வந்த அந்த பெரு மழை தலைநகரை சீரழித்து விட்டது. மக்கள் அப்படியே ஸ்தம்பித்துப் போய் விட்டனர்.

இதெல்லாம்தான் காலநிலை மாற்றத்தின் அறிகுறிகள்.. எதிர்பாராததை எதிர்பாருங்கள் என்று சொல்வோம் இல்லையா.. இனிமேல் இப்படித்தான் நடக்கும். திடீர் மழை, திடீர் புயல், திடீர் வெள்ளம், பெரும் வறட்சி, பசி, பட்டினி, பஞ்சம்.. எல்லாம் நடக்கும். காரணம், பூமியை அந்த அளவுக்கு நாம் நாசப்படுத்தி வைத்துள்ளோம். "கிளைமேட் சேஞ்ச்" என்ற காலநிலை மாற்றத்தின் பின்விளைவுகள் இவை.

நேற்றைய பெரு மழை போல திடீர் திடீரென இனி அடிக்கடி மழைப் பொழிவு இருக்கும். வந்தால் புரட்டி விட்டுப் போகும். இதற்கெல்லாம் இனியும் அந்த ஆட்சிதான் காரணம், இந்த ஆட்சிதான் காரணம், இந்தக் கட்சி சரியில்லை, அந்தக் கட்சி சரியில்லை என்று அரசியல் செய்து கொண்டிருக்க முடியாது. இது "சூழலியல் அழிவு"க்கான அறிகுறிகள். இதையெல்லாம் சூழலியல் விஞ்ஞானிகளும், நிபுணர்களும் பல ஆண்டுகளாக எச்சரித்து வருகின்றனர். காலநிலை மாற்றத்தை அவசர நிலையாக அறிவித்து ஒவ்வொரு நாடும் சுற்றுச்சூழல் பாதுகாப்புக்கு முக்கியத்துவம் கொடுக்க வேண்டிய தருணம் வந்து விட்டது என்று எச்சரித்தபடி உள்ளனர். ஆனால் பெரும்பாலான உலக நாடுகள் இதைப் பற்றி அக்கறையே காட்டாமல் உள்ளன.

இந்த அக்கறையின்மைதான் கிரெட்டா தன்பர்க் உள்ளிட்டோரை கொதிக்க வைத்து கோபத்தைக் கக்க வைத்தது. அப்படியும் கூட நாம் இன்னும் சுதாரித்தபாடில்லை. நேற்றைய பேய் மழையைப் பார்த்த பிறகாவது மக்களுக்கு இதன் அதி பயங்கர விளைவுகள் லேசாக புரிந்திருக்கக் கூடும். நேற்று பெய்த மழையாவது 7-8 மணி நேரத்திற்குத்தான் பெய்ததே. இதுவே பல மணி நேரம் பேய்த்தனமாக பெய்தால் என்னாகும்.. கொஞ்சம் கற்பனை செய்து பாருங்கள்.. நமது நிலையை. உயிர் பிழைப்போமா என்பதே கேள்விக்குறியாகி விடும். அப்படிப்பட்ட சூழல் எதிர்காலத்தில் வரும் என்பதுதான் நாம் இப்போதே மனதில் இருத்திக் கொள்ள வேண்டிய முக்கியமான விஷயமாகும்.

பூவுலகின் நண்பர்கள் அமைப்பின் ஜி. சுந்தரராஜன் இதுகுறித்துக் கூறுகையில், சென்னையை புரட்டிப்போட்ட மழைக்கு பிறகும் காலநிலை மாற்றத்தை முக்கிய பிரச்சனையாக நாம் எடுத்துக்கொள்ளவில்லை எனில் சொல்வதற்கு ஒன்றுமில்லை. இதில் உள்ள மிகப்பெரிய சவால், எந்த மாதிரிகளும் இதை கணிக்கவில்லை என்பதுதான், இது காலநிலை மாற்றத்தின் தீவிரத்தன்மையை காட்டுகிறது.

மீண்டும் தமிழக முதல்வரை கோருகிறோம், தமிழ்நாட்டில் “காலநிலை அவசரநிலையை” அறிவிக்க வேண்டும். ஆரம்பகட்டத்தில் உள்ள அனைத்து அனல் மின்நிலையங்களையும் கைவிட வேண்டும் என்று அவர் கோரிக்கை விடுத்துள்ளார். நேற்றைய சென்னை மழை, காலநிலை மாற்றத்துக்கான டீசர் போலத்தான். இதை விட மிகப் பெரிய பேரழிவுகளெல்லாம் எதிர்காலத்தில் வரும் என்கிறார்கள் - நாம் இப்போதாவது சுதாரித்து உரிய நடவடிக்கை எடுக்காவிட்டால்.

தேவையில்லாத விஷயங்களுக்கெல்லாம் கோடிக்கணக்கில் கொட்டிக் கொட்டி வீணடிக்கும் பணத்தை காலநிலை மாற்றம் தொடர்பான செயல்பாடுகளுக்கும், விழிப்புணர்வுக்கும் அரசுகள் பயன்படுத்த வேண்டிய கட்டாயம் வந்து விட்டது. இப்போதும் நாம் சுதாரிக்காவிட்டால், நம்மை யாராலும் காப்பாற்ற முடியாது.