ஒன்றிய அமைச்சரவை மாற்றம்: சாதி வாரி பிரதிநிதித்துவம்; முக்கிய அம்சங்கள் என்ன?

ஒன்றிய அமைச்சரவை மாற்றம்: சாதி வாரி பிரதிநிதித்துவம்; முக்கிய அம்சங்கள் என்ன?

கடந்த 2019ஆம் ஆண்டு மக்களவை தேர்தலில் பாஜக மீண்டும் வெற்றி பெற்று இரண்டாவது முறையாக பிரதமராக நரேந்திர மோடி பதவியேற்றார். அப்போது அமைக்கப்பட்ட அமைச்சரவைக்குப் பின்னர் தற்போது வரை எந்த விரிவாக்கமும் செய்யப்படாமல் இருந்தது. இதனிடையே, கூட்டணி கட்சிகளை சேர்ந்த அமைச்சர்கள் ராஜினாமா, உயிரிழப்பு போன்ற நிகழ்வுகளின்போதும் கூட அமைச்சரவைவில் எவ்வித மாற்றமும் விரிவாக்கமும் செய்யப்படாமல் இருந்தது.

இந்த நிலையில், சில மாநிலங்களில் எதிர்வரும் சட்டமன்றத் தேர்தல், 2024ஆம் ஆண்டு மக்களவை தேர்தலை கருத்தில் கொண்டு அமைச்சரவையில் மாற்ற கொண்டுவர ஒன்றிய அரசு திட்டமிட்டது. அதன்படி, கடந்த சில நாட்களாகவே பாஜக மூத்த தலைவர்களுடன் பிரதமர் மோடி தொடர்ந்து ஆலோசனை மேற்கொண்டு வந்தார்.

அதன் தொடர்ச்சியாக, பிரதமர் மோடி இரண்டாவது முறையாக பதவியேற்ற பின்னர் முதன்முறையாக ஒன்றிய அமைச்சரவை இன்று மாலை விரிவாக்கம் செய்யப்படவுள்ளது. புதிய அமைச்சர்கள் இன்று மாலை 6 மணியளவில் பதவியேற்கவுள்ளனர். இதற்காக பிரதமர் மோடியின் இல்லத்துக்கு புதிய அமைச்சர்களாக பதவியேற்பவர்கள் உள்பட ஏராளமான பாஜகவினர் வருகை புரிந்த வண்ணம் உள்ளனர்.

அமைச்சரவையில் இடம்பெற ஏற்கனவே நாடு முழுவதும் பல்வேறு மாநிலங்களில் பாஜக தலைவர்கள் முயற்சி மேற்கொண்டு வந்தனர். இதற்காக அவர்கள் டெல்லியில் முகாமிட்டிருந்தனர். இந்த நிலையில், புதிய அமைச்சரவை தொடர்பான சில தகவல்கள் கிடைத்துள்ளன.