அனைவருக்கும் இலவசமாக வழங்க முடிவு; தமிழக அரசின் சூப்பர் அறிவிப்பு!
தமிழக மீனவர்கள் மீன்பிடிக்க கடலுக்குச் செல்லும் போது கடல் எல்லையை தாண்டும் சம்பவங்கள் பல்வேறு சமயங்களில் அரங்கேறுகின்றன. குறிப்பாக கச்சத்தீவு அருகே செல்லும் போது இலங்கை கடற்படையினர் விரைந்து வந்து விரட்டி அடித்து விடுகின்றனர். அதுமட்டுமின்றி படகுகள் மீது தாக்குதல், மீனவர்கள் வலைகளை சேதப்படுத்துதல், துப்பாக்கிச்சூடு உள்ளிட்ட விபரீதங்கள் நிகழ்கின்றன.
நவீன டிரான்ஸ்பான்டர் கருவிகள்
எனவே கடல் எல்லையை தெரிந்து கொள்வதற்கு தொழில்நுட்ப ரீதியான உதவி மீனவர்களுக்கு தேவைப்படுகிறது. இந்த விஷயத்தில் மீனவர்களுக்கு கைகொடுக்க இஸ்ரோ முன்வந்தது. அதாவது, தமிழக மீனவர்கள் கடல் எல்லையை தாண்டுவதை தடுக்கவும், மீன்பிடி படகுகள் செல்வதை கண்காணிக்கவும், தகவல் தொடர்பு வசதிக்கும் நவீன டிரான்ஸ்பான்டர் -ஐ வடிவமைக்க முடிவு செய்தது. இதற்கான பணிகள் முடுக்கிவிடப்பட்டு தற்போது இறுதிகட்டத்தை எட்டியுள்ளது.
இஸ்ரோ சிறப்பான ஏற்பாடு
இந்நிலையில் சென்னை தலைமைச் செயலகத்தில் மீன்வளத்துறை கூடுதல் தலைமைச் செயலாளர் டி.எஸ்.ஜவஹர் செய்தியாளர்களை சந்தித்தார். அப்போது பேசுகையில், இஸ்ரோ நிறுவனம் வடிவமைத்துள்ள நவீன டிரான்ஸ்பான்டர் கருவிகள் ஆனது மீன்பிடிக்க ஆழ்கடலுக்கு செல்லும் போது மீனவர்கள் கடல் எல்லையை தாண்டுவதை தடுக்க உதவுகிறது.
இலவசமாக வழங்கும் தமிழக அரசு
புயல், மழைக் காலங்களில் கடலில் சிக்கியுள்ள படகுகளை கண்டறியவும் உதவும். இந்த கருவிகளை இஸ்ரோ நிறுவனத்திடம் இருந்து தமிழக அரசு கொள்முதல் செய்து வருகிறது. நவீன டிரான்ஸ்பான்டர் கருவிகள் மீனவர்களுக்கு பயன் அளிப்பதோடு, ஆபத்தில்லாமல் மீன்பிடிப்பதையும் உறுதி செய்கிறது. இஸ்ரோ வடிவமைத்த நவீன டிரான்ஸ்பான்டர் கருவிகளை மீனவர்களுக்கு தமிழக அரசு இலவசமாக வழங்கவுள்ளது.
முதல்கட்டமாக 15 கோடி ரூபாய் மதிப்பில் 5 ஆயிரம் டிரான்ஸ்பான்டர் கருவிகளை வரும் அக்டோபர் மாதம் மீனவர்களுக்கு அரசு இலவசமாக வழங்கும் என்று தெரிவித்தார். இந்த அறிவிப்பு தமிழக மீனவர்கள் மத்தியில் மிகுந்த மகிழ்ச்சியை ஏற்படுத்தியுள்ளது.
No comments:
Post a Comment