திருப்பதி லட்டு இனிமே இப்படித்தான்: அசத்தும் தேவஸ்தானம்!

திருப்பதி லட்டு இனிமே இப்படித்தான்: அசத்தும் தேவஸ்தானம்!

திருப்பதி திருமலையில் வீற்றிருக்கும் ஏழுமலையானை நாள்தோறும் லட்சக்கணக்கான பக்தர்கள் தரிசித்து வருகின்றனர். கொரோனா காலம் என்பதால் தற்போது கட்டுப்பாடுகளுடன் குறைவான பக்தர்களே அனுமதிக்கப்பட்டு வருகின்றனர். திருப்பதி ஏழுமலையான் கோயிலில் பிரசாதமாக லட்டு வழங்கப்படும். திருப்பதி லட்டு பிரசாதம் உலகப் புகழ் பெற்றது.

இந்த நிலையில், சுற்றுச்சூழலை பாதிக்காத வகையிலான மக்கும் பைகளில் திருப்பதி லட்டு பிரசாதம் இனி வழங்கப்படவுள்ளது. பாதுகாப்பு ஆராய்ச்சி மற்றும் மேம்பாட்டு அமைப்பு (DRDO) தயாரித்துள்ள மக்கும் பைகளை பயன்படுத்தி இனிமேல் லட்டு விநியோகம் செய்யப்படவுள்ளது. டிஆர்டிஓ தலைவர் சதீஷ் ரெட்டி, திருமலை திருப்பதி தேவஸ்தானத்தின் செயல் அலுவலர் ஜவகர் ரெட்டி, கூடுதல் இ.ஓ., தர்ம ரெட்டி ஆகியோர், திருமலையில் முதற்கட்டமாக இதற்கென ஒரு பிரத்யேக விற்பனை கவுண்டரைத் திறந்து வைத்தனர்.

அதன்பின்னர் செய்தியாளார்களின் பேசிய டிஆர்டிஓ தலைவர், “தீங்கு விளைவிக்காத சோள மாவுச்சத்தாலான சுற்று சூழலுக்கு உகந்த இந்த பைகளை நாங்கள் தயாரித்துள்ளோம். திருப்பதி பிரசாத லட்டுவிற்காக இந்த பைகள் தயாரிக்கப்பட்டுள்ளன” என்றார்.