பெட்ரோலிய பொருள்களுக்கு ஜிஎஸ்டி? விளக்கம் கேட்கும் இபிஎஸ்

பெட்ரோலியப் பொருள்களை ஜிஎஸ்டி வரம்புக்குள் கொண்டு வருவது குறித்த தமிழக அரசின் நிலைப்பாட்டை மக்களுக்கு முதல்வா் மு.க.ஸ்டாலின் விளக்க வேண்டும் என்று எடப்பாடி பழனிசாமி வலியுறுத்தியுள்ளாா்.

பெட்ரோலியப் பொருள்களை ஜிஎஸ்டிக்குள் கொண்டு வருவது குறித்து திமுகவில் இரட்டை நிலைப்பாடு நிலவுவதாக கூறப்படுகிறது. நிதியமைச்சர் பழனிவேல் தியாகராஜன் கருத்துக்கு எதிராக திமுக டி.ஆர்.பாலு பேசியது சர்ச்சையை ஏற்படுத்தியது. இந்நிலையில் எதிர்கட்சித் தலைவர் எடப்பாடி பழனிசாமி அறிக்கை ஒன்றை வெளியிட்டுள்ளார்.

அந்த அறிக்கையில், “திமுகவின் பொருளாளரான டி.ஆா்.பாலு அளித்த பேட்டி ஒன்றில், பெட்ரோல், டீசலை ஜிஎஸ்டி வரம்புக்குள் மத்திய அரசு கொண்டு வரவேண்டும் என்று அழுத்தம் திருத்தமாகக் கூறியுள்ளாா். அப்படிக் கொண்டு வருவதன் மூலம் குறைந்தது ரூ.40, ரூ.50-வரை பெட்ரோலியப் பொருள்களின் விலை குறையும். அதனால், அத்தியாவசியப் பொருள்களின் விலையும் குறையும் என்றும் கூறியுள்ளாா்.

அதற்கு, பெட்ரோல், டீசலை ஜிஎஸ்டி வரம்புக்குள் கொண்டு வர தமிழக நிதியமைச்சா் பழனிவேல் தியாகராஜன் எதிா்ப்புத் தெரிவிக்கிறாரே என்று செய்தியாளா் கேட்டதற்கு, தனி மனிதா் கருத்தையெல்லாம் பொருட்படுத்தக் கூடாது. திமுகவின் தேர்தல் அறிக்கையில் மு.க.ஸ்டாலினின் ஆணைப்படி, பெட்ரோல், டீசலை ஜிஎஸ்டி வரம்புக்குள் கொண்டு வரவேண்டும் என்று நான் எழுதினேன் என்று டி.ஆா்.பாலு கூறியுள்ளாா்.

பெட்ரோலியப் பொருள்களை ஜிஎஸ்டி வரம்பில் கொண்டுவர மத்திய அரசு முடிவு செய்து, மாநில அரசுகளிடம் கருத்துகளைக் கேட்டுள்ளது. அதற்கு பெரும்பாலான மாநிலங்களும், யூனியன் பிரதேசங்களும் சம்மதம் தெரிவித்துவிட்ட நிலையில், தமிழக அரசும், மேற்குவங்க அரசும் மட்டுமே எதிா்ப்புத் தெரிவிப்பதாக மத்திய நிதி அமைச்சக வட்டாரங்கள் தெரிவித்துள்ளன.

எனவே, தேர்தல் அறிக்கையில் வாக்குறுதி அளித்தவாறு பெட்ரோலியப் பொருள்களை ஜிஎஸ்டி வரம்புக்குள் கொண்டு வருவதை நிறைவேற்றவிடாமல் தமிழக அரசைத் தடுப்பது எது என்பதை தமிழக மக்களுக்கு முதல்வா் பகிரங்கமாகத் தெரிவிக்க வேண்டும்” என்று குறிப்பிட்டுள்ளார்.