7 நாட்கள் சிறப்பு விடுமுறை - அரசு ஊழியர்களுக்கு ஜாக்பாட்!

அரசு ஊழியர்களுக்கு மகிழ்ச்சியான அறிவிப்பு வெளியாகி உள்ளது

கர்நாடக மாநிலத்தில், முதலமைச்சர் பசவராஜ் பொம்மை தலைமையிலான பாரதிய ஜனதா கட்சியின் ஆட்சி நடைபெற்று வருகிறது. இந்த மாநிலத்தில் பணிபுரியும் அரசு ஊழியர்கள், கொரோனா வைரஸ் தொற்றால் பாதிக்கப்பட்டால், ஏழு நாட்கள் சிறப்பு விடுமுறை எடுத்துக் கொள்ளலாம் என அம்மாநில அரசு அறிவித்துள்ளது.

இது தொடர்பாக கர்நாடக மாநில நிதித் துறை அமைச்சகம் வெளியிட்டுள்ள செய்திக் குறிப்பில் தெரிவிக்கப்பட்டு உள்ளதாவது:

கொரோனா வைரஸ் தொற்றால் பாதிக்கப்படும் அரசு ஊழியர்கள் அல்லது அவர்களது குடும்பத்தில் யாருக்காவது கொரோனா பாதிப்பு உறுதி செய்யப்பட்டால், ஏழு நாட்களுக்கு சிறப்பு விடுமுறையை எடுத்துக் கொள்ளலாம். இதே போல் நோய்க் கட்டுப்பாட்டு பகுதிகளில் வசிக்கும் அரசு ஊழியர்களும் ஒரு வாரம் சிறப்பு விடுமுறைய எடுத்துக் கொள்ளலாம். அத்தகைய விடுப்பின் போது, தொலைபேசி மற்றும் ஆன்லைன் வாயிலாக அலுவலக அவசரப் பணிகளை அவர்கள் செய்ய வேண்டும்.

இவ்வாறு அதில் தெரிவிக்கப்பட்டு உள்ளது.

இதற்கிடையே, வரும் 31 ஆம் தேதி முதல் இரவு நேர ஊரடங்கை ரத்து செய்து கர்நாடக மாநில அரசு உத்தரவு பிறப்பித்து உள்ளது. மேலும், திங்கட்கிழமை முதல் பள்ளி, கல்லூரிகள் செயல்படவும் அனுமதி அளிக்கப்பட்டு உள்ளது. அரசு அலுவலகங்களும் 100 சதவீத ஊழியர்களுடன் இயங்க கர்நாடக மாநில அரசு உத்தரவு பிறப்பித்துள்ளது குறிப்பிடத்தக்கது.