ஆண்டர்சன் பாய், நீ அணியவிட்டு போயிடு…மைக்கேல் வான் வலியுறுத்தல்: ஆண்டர்சன் தரமான பதிலடி!

ஆண்டர்சன் பாய், நீ அணியவிட்டு போயிடு…மைக்கேல் வான் வலியுறுத்தல்: ஆண்டர்சன் தரமான பதிலடி!

ஜேம்ஸ் ஆண்டர்சன் அணியிலிருந்து விலக வேண்டும் என முன்னாள் கேப்டன் மைக்கேல் வான் வலியுறுத்தியுள்ளார்.

ஆஸ்திரேலியா சென்றுள்ள இங்கிலாந்து அணி, ஐந்து போட்டிகள் கொண்ட ஆஷஸ் தொடரில் பங்கேற்று விளையாடி வருகிறது. இதில் முதல் மூன்று போட்டிகள் நடந்து முடிந்துள்ள நிலையில், அனைத்திலுமே இங்கிலாந்து படுமோசமாக தோற்று, தொடரை இழந்தது.

இதனைத் தொடர்ந்து நான்காவது டெஸ்ட் போட்டி, சிட்னியில் துவங்கி நடைபெற்றது. இதில் இரு அணி வீரர்களும் கடுமையாக போராடிய நிலையில், கடைசி நாளின் கடைசி நிமிடங்களில் ஆஸ்திரேலிய வெற்றிபெற ஒரு விக்கெட் மட்டுமே தேவைப்பட்டது. இங்கிலாந்து டெய்ல் என்டர்ஸ் ஸ்டூவர்ட் பிராட், ஜேம்ஸ் ஆண்டர்சன் இருவரும் சிறந்த முறையில் தடுப்பாட்டத்தில் ஈடுபட்டதால், போட்டி டிரா ஆனது. இதனைத் தொடர்ந்து ஐந்தாவது மற்றும் கடைசிப் போட்டி ஹாபர்டில் நாளை துவங்கவுள்ளது.

இந்நிலையில் இங்கிலாந்தின் புகழ்பெற்ற நாளிதழான டெலிகிராப் பத்திரிகையில், ஜேம்ஸ் ஆண்டர்சன் குறித்து இங்கிலாந்து அணி முன்னாள் கேப்டன் மைக்கேல் வான், ஒரு கட்டுரை எழுதியுள்ளார். அது தற்போது பெரிய புயலைக் கிளப்பியுள்ளது.

அதில், “ஜேம்ஸ் ஆண்டர்சன் ஓய்வுபெற்றால்தான், அணி முன்னோக்கி நகரும். அவர் நீண்ட காலமாக அணியில் இடம்பிடித்து, மற்றவர்களுக்கு அந்த இடத்தை தராமால் இருக்கிறார். அவர் இருக்கும்வரை, அணி பலம் வாய்ந்ததாக இருக்காது. ஆண்டர்சன் சிறந்த பௌலர்தான். அவரால் அடுத்த இரண்டு வருடங்கள்வரைகூட சிறப்பாக பந்துவீச முடியும். இருப்பினும், அவர் தனது இடத்தை, தன்னைவிட மற்ற திறமையானவர்களுக்கு விட்டுக்கொடுக்க வேண்டும்” எனத் தெரிவித்தார்.

ஆண்டர்சன் பதிலடி:

இதனைத் தொடர்ந்து அதே டெலிகிராப் பத்திரிகையில் கட்டுரை எழுதிய ஆண்டர்சன், “இங்கிலாந்து அணிக்கு நான் தேவை. இதனை கேப்டனும், நிர்வாகமும் கூட என்னிடம் கூறியிருக்கிறது. இதனால், நான் யாருக்கும் எனது இடத்தை கொடுக்காமல் இருக்கிறேன் எனக் கூறுவது தவறானது. நான் எனது இடத்தில் இருக்கிறேன்” எனத் தெரிவித்தார்.

மேலும், “நான் வெளிப்படையாகவே கூறுகிறேன். இங்கிலாந்து அணி ஆஷஸ் தொடரை இழக்கும் போதெல்லாம் இதேமாதிரி சிலர் விமர்சனம் செய்வதுண்டு. வீரர்களை கடுமையாக சாடுவார்கள். கேப்டன், பயிற்சியாளர், பேட்ஸ்மேன், பௌலர் யாருக்கும் உறுதியான எதிர்காலம் இருக்காது என்பார்கள். இது வழக்கமான ஒன்றுதான்” எனக் கூறினார்.

இங்கிலாந்து அணி முன்னணி வேகப்பந்து வீச்சாளர் ஜேம்ஸ் ஆண்டர்சன், மொத்தம் 640 டெஸ்ட் விக்கெட்களை கைப்பற்றி, உலக அளவில் அதிக விக்கெட்களை கைப்பற்றியோர் பட்டியலில் மூன்றாவது இடத்தில் இருக்கிறார் என்பது குறிப்பிடத்தக்கது.