காதலர் தினத்தன்று.. தேர்தல் ஆணையத்தின் "சென்ஸ் ஆப் குசும்பு".. கோவா ஹேப்பி அண்ணாச்சி!

காதலர் தினத்தன்று.. தேர்தல் ஆணையத்தின் "சென்ஸ் ஆப் குசும்பு".. கோவா ஹேப்பி அண்ணாச்சி!

கோவா மாநிலத்தில் காதலர் தினமான பிப்ரவரி 14ம் தேதி சட்டசபைத் தேர்தல் நடைபெறவுள்ளது கலகலப்பை ஏற்படுத்தியுள்ளது.

5 மாநில சட்டசபைத் தேர்தலில் 3 மாநிலங்களுக்கு பிப்ரவரி 14ம் தேதி தேர்தல் அறிவிக்கப்பட்டுள்ளது. அதில் கோவா மாநிலமும் ஒன்று. காதலர் தின கொண்டாட்டங்களுக்குப் பெயர் போன கோவாவுக்கு, காதலர் தினமான பிப்ரவரி 14ம் தேதி தேர்தல் அறிவிக்கப்பட்டிருப்பது கலகலப்பை ஏற்படுத்தியுள்ளது.

உத்தரப் பிரதேசம், உத்தரகாண்ட், பஞ்சாப், கோவா, மணிப்பூர் ஆகிய மாநிலங்களுக்கு தேர்தல் தேதிகளை இன்று ஆணையம் அறிவித்தது. அதன்படி உத்தரப் பிரதேசத்திற்கு 7 கட்ட வாக்குப் பதிவும், மணிப்பூருக்கு 2 கட்ட வாக்குப் பதிவும் நடைபெறவுள்ளது.

அதேசமயம், பஞ்சாப், கோவா மற்றும் உத்தரகாண்ட் மாநிலங்களுக்கு ஒரே கட்டமாக பிப்ரவரி 14ம் தேதி தேர்தல் நடைபெறவுள்ளது. இதில்தான் தேர்தல் ஆணையத்தின் "சென்ஸ் ஆப் குசும்பு" கலகலப்பை ஏற்படுத்தியுள்ளது.

மேலை நாடுகளில் கொண்டாடப்பட்டு வந்த காதலர் தினம் இந்தியாவிலும் கோலாகலமாக கொண்டாடப்படுகிறது. குறிப்பாக கோவா, புதுச்சேரி உள்ளிட்ட இந்தியாவின் சில பகுதிகளில் காதலர் தினம் களை கட்டியிருக்கும். அதிலும் கோவாவில் இது மிகப் பெரிய கார்னிவல் அதாவது திருவிழா போல கொண்டாடப்படும்.

காதலர் தினத்தையொட்டி அங்குள்ள ஹோட்டல்கள் , ரிசார்ட்டுகளில் கூட்டம் நிரம்பி வழியும், கடற்கரைகளில் மணலுக்குப் பதில் காதலர்கள்தான் நிறைந்திருப்பார்கள். பல்வேறு போட்டிகள், கலை நிகழ்ச்சிகள், இசை நிகழ்ச்சிகள் என களை கட்டியிருக்கும். சொகுசு கப்பல்களிலும் கொண்டாட்டங்கள் அமர்க்களப்படும். இத்தகைய சிறப்பு வாய்ந்த பிப்ரவரி 14ம் தேதியன்று அங்கு தேர்தல் ஆணையம் இந்த முறை தேர்தலை அறிவித்துள்ளது.

கோவாவில் தற்போது பாஜக ஆட்சி நடைபெற்று வருகிறது. ஆனால் அங்கு அக்கட்சியின் செல்வாக்கு குறைந்து விட்டதாக கூறப்படுகிறது. அதேசமயம், காங்கிரஸும் பலமில்லாமல்தான் இருக்கிறது. இடையில் புகுந்து ஆதாயம் பார்க்க திரினமூல் உள்ளிட்ட கட்சிகள் முயல்கின்றன. இந்த நிலையில் தற்போது தேர்தல் தேதி அறிவிக்கப்பட்டிருப்பதால் எதிர்பார்ப்புகளும் எகிறியுள்ளன.

காதல் திருவிழாவோடு இந்த முறை தேர்தல் திருவிழாவும் இணைந்து கோவாவை திணறடிக்கப் போகிறது. எல்லாம் சரி, கோவா மக்களின் நேசத்துக்குரிய "வேலன்டைன்" ஆக மாறப் போவது யார்.. எந்தக் கட்சி.. பொறுத்திருந்து பார்ப்போம்.