நிசான் நிறுவனத்தை காப்பற்றிய மேகனைட் கார்! 50 ஆயிரம் கார்கள் விற்பனை!

இந்தியாவில் பல ஆண்டுகளாக சந்தையில் கால்பதிக்க முடியாமல் தடுமாறிவந்த நிசான் நிறுவனத்தை அந்த நிறுவனத்தின் மேகனைட் கார் அதிகப்படியான விற்பனையின் மூலம் காப்பாற்றி உள்ளது. இந்த கார் இந்தியாவில் இதுவரை 50 ஆயிரத்திற்கும் அதிகமாக விற்பனையாகியுள்ளது. சப் 4 மீட்டர் கார்களில் தனி முத்திரையை இந்த கார் படைத்துள்ளது. இந்த கார் தொடங்கியது முதல் தற்போது வரை நடந்த நிகழ்வுகள் மற்றும் எப்படி இந்த சாதனையை நிசான் நிகழ்த்தியது என்பது குறித்து இந்த பதிவில் காணலாம்.

ஜப்பான் நாட்டின் நிசான் நிறுவனம் உலகம் முழுவதும் மிகவும் பிரபலமான நிறுவனம் ஆகும். முக்கியமாக அந்த நிறுவனத்தின் GT கார் உலக அளவில் ஜப்பானிய கார்களில் சிறந்த ஸ்போர்ட்ஸ் காராக உள்ளது.

அந்த நிறுவனம் இந்தியாவில் பல ஆண்டுகளாக கார் விற்பனை செய்துவருகிறது. இந்த நிறுவனம் தமிழ் நாட்டில் உள்ள சென்னையில் ஒரகடம் என்கிற இடத்தில் தொழிற்சாலை அமைத்து கார்களை உற்பத்தி செய்துவருகிறது.

இந்த நிறுவனம் அதே தொழிற்சாலையில் ரெனால்ட் நிறுவனத்துடன் இணைந்து கார்களை தயாரித்துவருகிறது. பல ஆண்டுகளாக இந்தியாவில் இருந்தும் மக்கள் நிசான் கார்களை அவ்வளவாக வரவேற்கவில்லை. இதற்கு முக்கிய காரணம் நிசான் கார்களின் விலை மற்றும் சர்வீஸ் ஆகும்.

நிசான் நிறுவனம் குறைந்த விலையில் அதன் மற்றொரு நிறுவனமான டட்சன் நிறுவன கார்களை விற்பனை செய்து வந்தது. ஆனால் அந்த கார்களும் பெரும் அளவு வரவேற்பு பெறாத காரணத்தால் அந்த கார்களை நிறுத்தியது.

இந்தியாவில் தற்போது காம்பாக்ட் SUV ரக கார்களுக்கு மவுசு அதிகரித்ததையடுத்து அதன் கிக்ஸ் காரை இந்தியாவில் அறிமுகம் செய்தது. எல்லா விதத்திலும் சிறப்பான காராக இந்த கார் இருந்தபோதிலும் விலை அதிகம் என்கிற காரணத்தால் இந்த கார் விற்பனையில் மந்தமாகவே இருந்துவருகிறது.

ஏற்கனவே அமெரிக்க கார் நிறுவனங்களான செவ்ரோலெட் மற்றும் போர்ட் ஆகிய நிறுவனங்கள் குறைந்த விற்பனை காரணமாக இந்தியாவை விட்டு வெளியேறிய நிலையில் பலர் நிசான் நிறுவனமும் இதுபோன்ற முடிவை எடுக்கும் என்று எதிர்பார்த்தனர்.

Nissan Magnite 

ஆனால் நிசான் நிறுவனம் விடுவதாக இல்லை. தங்களின் கடைசி அஸ்திரமாக ஒரு புதிய செக்மென்ட்டில் சப் 4 மீட்டர் கார் ஒன்றை வெளியிட்டது. அந்த கார் மேகனைட் என்று பெயரிடப்பட்டு வெளியானது.

தற்போது நிசான் நிறுவனத்திற்கு மகிழ்ச்சி தரும் விதமாக அந்த கார் மக்கள் மத்தியில் பெரிய அளவு வரவேற்பு பெற்று இதுவரை இந்தியாவில் மட்டும் 50 ஆயிரம் கார்கள் விற்பனை ஆகிவிட்டன. மேலும் உலகம் முழுவதும் 1 லட்சம் கார்களுக்கு அதிகமாக முன்பதிவு செய்யப்பட்டுள்ளன.

நிசான் எப்படி மீண்டது?

நிசான் நிறுவனம் இந்த காரை கடந்த 2020 ஆம் ஆண்டு டிசம்பர் மாதம் வெளியிட்டது. NEXT என்கிற திட்டம் மூலம் இந்த கார் உலகம் முழுவதும் 15 நாடுகளுக்கும் அதிகமான இடங்களில் விற்பனை செய்யப்படுகிறது. இந்தியாவிலேயே தயாரிக்கப்பட்ட இந்த கார் ஏற்கனவே பாதுகாப்பில் உலகளவில் 4 ஸ்டார்களை பெற்றுள்ளது. தற்போது நிசான் நிறுவனத்தின் மிகவும் அதிகமாக வாங்கப்படும் காராக இந்த மேகனைட் மாறியுள்ளது.

இதற்கு முன்பு நிசான் நிறுவனத்தின் இந்திய சந்தை அவ்வளவு நன்றாக இல்லை. சன்னி, மைக்ரா, டெர்ரானோ, கிக்ஸ் போன்ற கார்கள் சிறப்பாக இருந்தாலும் போட்டி நிறுவனங்களின் கார்கள் விற்பனை மற்றும் விலை காரணமாக அதிகளவு விற்பனையாகவில்லை.

Nissan Magnite Export 

மேலும் இந்திய வாடிக்கையாளர்கள் குறைந்த விலைக்கு சிறந்த அம்சங்களை எதிர்பார்க்கிறார்கள் என்று நிசான் நிறுவனம் புரிந்துகொண்டுவிட்டது. அதனால் புதிய செக்மென்டை உருவாக்கி அந்த செக்மென்ட்டில் சிறந்த வசதிகள் கொண்ட காரக இந்த மேகனைட் காரை அறிமுகம் செய்தது.

இந்த கார் தன்னந்தனியாக நிசான் நிறுவனத்தை தற்போது காப்பாற்றியுள்ளது. மேலும் காம்பாக்ட் SUV ரக கார்களை போலவே இருக்கும் இந்த சப் காம்பாக்ட் SUV ரக காரை மக்களிடம் கொண்டுசேர்த்துவிட்டது.

இதன் விலை குறைவாகவும், பிரீமியம் வசதிகளும், சிறந்த மைலேஜ், பாதுகாப்பு, இடவசதி போன்ற அனைத்தும் இந்த காரில் உள்ளது. பல ஆண்டுகள் வெற்றியே சந்திக்காத நிசான் நிறுவனம் தொடர்ந்து போராடி விடா முயற்சி மூலம் தற்போது வெற்றி வாகை சூட்டியுள்ளது. ஆனால் இதனை இதோடு விடாமல் மேலும் இதுபோன்ற கார்களை அறிமுகம் செய்து வளர்ச்சி பெறவேண்டும்.

இதே போன்ற கார்களை இந்தியாவில் சிறந்த பாதுகாப்பு, வசதிகள், 7 லட்ச ரூபாய் விலை, மைலேஜ், சர்வீஸ் போன்ற வசதிகள் கொண்டு அறிமுகம் செய்தால் இன்னும் பல ஆண்டுகள் இந்தியாவில் நிசான் நிறுவனம் சிறப்பாக கார்களை விற்பனை செய்யமுடியும்.