உக்ரைனில் இருந்து தமிழகம் திரும்பும் மாணவர்களுக்கு இலவச உளவியல் ஆலோசனை!

உக்ரைனில் இருந்து தமிழகம் திரும்பும் மாணவர்களுக்கு இலவச உளவியல் ஆலோசனை வழங்குவதற்கான கட்டணமில்லா அழைப்பு மையம் திறக்கப்பட்டுள்ளது

உக்ரைன் மீது ரஷ்யா போர் தொடுத்துள்ள நிலையில், அங்கு சிக்கித் தவிக்கும் இந்தியர்களை மீட்கும் நடவடிக்கைகளை ஆப்ரேஷன் கங்கா என்ற பெயரில் மத்திய அரசு மேற்கொண்டு வருகிறது. அதேபோல், மாணவர்கள் மீட்பு நடவடிக்கைக்காக தமிழக அரசு சார்பில் இதற்காக சிறப்பு குழு அமைக்கப்பட்டு ஒருங்கிணைக்கப்பட்டுள்ளது.

இந்த நிலையில், உக்ரைனில் இருந்து தமிழகம் திரும்பும் மாணவர்களுக்கு இலவச உளவியல் ஆலோசனை வழங்குவதற்கான கட்டணமில்லா அழைப்பு மையம் திறக்கப்பட்டுள்ளது. உக்ரைனில் இருந்து தமிழ்நாடு திரும்பிய மாணவர்களுக்கு உளவியல் ரீதியான ஆலோசனை வழங்க டிஎம்எஸ் வளாகத்தில் கட்டணமில்லா அழைப்பு மையத்தினை மக்கள் நல்வாழ்வுத்துறை அமைச்சர் மா.சுப்பிரமணியன் துவக்கி வைத்தார்.

அதன்பின்னர் செய்தியாளர்களை சந்தித்த அவர், தமிழ்நாட்டில் இருந்து உக்ரைன் சென்று படித்த மாணவர்கள் அங்கு உள்ள போர் பதற்ற சூழல் காரணமாக திரும்பி வந்துள்ளனர். இதுவரை 1456 மாணவர்கள் தமிழகத்திற்கு வந்து சேர்ந்துள்ளனர். இவர்கள் மீண்டும் உடனடியாக உக்ரைன் செல்வது என்பது நிகழாத காரியம். அவர்கள் கல்வி பாதிக்காத வகையில் உதவிட வேண்டும் என்ற கோரிக்கை வந்துள்ளது. அவர்களுக்கு மனநல ஆலோசனை தேவைப்படுகிறது. அதற்காக இந்த ஆலோசனை சேவை தொடங்கப்பட்டுள்ளது என்றார்.

மேலும், சுகாதாரத்துறைக்கு மற்றொரு புதிய திட்டத்திற்கான ஆலோசனை ஒன்றை நடத்தி இருக்கிறோம் எனவும், சுகாதார உரிமைக்கான சட்ட முன்வடிவு தயாரிக்க ஆலோசனை நடைபெற்றது எனவும் அமைச்சர் மா.சுப்பிரமணியன் தெரிவித்தார்.

தொடர்ந்து பேசிய அவர், அனைத்து தரப்பினருக்கும் தேவையான சுகாதார கட்டமைப்பு, அவர்களை காப்பாற்றுவது இதுதான் இதன் நோக்கம். தாய்லாந்து, வியட்நாம் போன்ற நாடுகளில் இது நடைமுறையில் உள்ளது. அசாமில் இந்த திட்டம் இன்னும் நடைமுறை படுத்தவில்லை. நடப்பு பட்ஜெட்டில் அமல்படுத்துவது குறித்து முதலமைச்சரிடம் ஆலோசனை மேற்கொண்ட பிறகு தமிழகத்தில் அமல் படுத்தப்படும் என்றார்.

இதனைத்தொடர்ந்து, பேசிய சுகாதாரத்துறை செயலர் ராதாகிருஷ்ணன், தடுப்பூசி போட்ட பிறகு கண் பார்வை இழந்த மாணவிக்கு optic nueropathy என்ற நோயும் கை கால் செயலிழந்த மாணவிக்கு Guillain Barre syndrome என்ற நோயும் தாக்கியிருப்பதாக மருத்துவர்கள் கண்டறிந்துள்ளனர். இவர்களுக்கு தடுப்பூசி செலுத்தியதால் தான் பாதிப்பு ஏற்பட்டதா என மருத்துவ குழு ஆராய்ந்து வருகிறது என்றார்.